اللعيب اللعيب بصحيح ما يجريش ويتحنجل في الملعب لحد ما نفسه ينقطع، حتى لو كان في النهاية هايجيب جون.
اللعيب اللي بجد، بحركة صغيرة قوي، يحول كل طاقة خصمه ومجهوده لجون في صالحه. حركة صغنونة خالص ومجهود بسيط يغير موازين القوي.. بذكاء، ومن غير حزق.
بص للإعلان ده. بيبسي حبت "تحط" على كوكاكولا وعملت إعلان في الهالويين، اللي الناس بتحتفل فيه بارتداء ملابس الأشباح والعفاريت المرعبة.
بيبسي حطت صورة علبة مشروب من عندها، "متسربل" برداء كوكاكولا، ووضعت تعليقا يلعب على الصورة البصرية لدراكيولا الشهير وامتدادا لخط الرعب المرتبط بالهالويين
قالت: نتمنى لك احتفالا مرعبا بأعياد الهالويين. (الصورة على اليسار).
(بيبسي بيحتفل معاكم ولابس لبس دراكيولا المرعب اللي هو كوكاكولا يا ولاد).
كوكاكولا ما خلصهاش، وعملت حركة عبقرية. نشرت نفس الإعلان بنفس التصميم والصورة (على اليمين هنا) وعملت الحركة الصغيرة اللي بقولك عليها. حركة اللعيب اللي بيخلي خصمه يتعب وهو يروح جايب الجون بهدوء وحرفية.
كوكاكولا لعبت على صورة ذهنية شبيهة. صورة الطفل اللي بيروح يجيب فوطة يلفها حوالين رقبته علشان يبقى بطل خارق زي سوبرمان والوطواط.
كوكاكولا كتبت: كل واحد عاوز يعمل نفسه بطل.
طبعا الجميل هنا ان كل الشرح اللي انت سمعته ده بيتنقل لمشاهد الصورة في لحظة، في أقل من لحظة... شفت العبقرية!
لعيب لعيب
ملحوظتين على السريع:
١- قوانين أمريكا تسمح بهذا النوع من "الحط" أو السخرية الإعلانية، وبالتحديد تسمح لك بالسخرية من الخصم بشكل علني ومكشوف واستخدام البراند بتاعه في إعلانك للسخرية منه، ولكن قوانين عدد كبير من أوربا لا تسمح بذلك على المكشوف. اتكلم عن نفسك يا كابتشن وما لكش دعوة بالخصم.
٢- لاحظ "الهدوء" البصري. التعليق في الإعلان مكتوب بخط أبيض وحجمه صغير. ما بيصرخش في وشك ويقولك: أنا إعلاااااااان ياولاد الللللل....، أنا دمي خفيييييييييييف، بص ياله انت وهو يااااااد.
مافيش جعير. كله بالأدب والهدوء.
٣- لما بانشر حاجة زي كده باحاول اقول ان تكوين ثقافة بصرية ذكية شيء مهم للغاية لإن أي حاجة بتلعب في خلايا الدماغ وتنشطها، بما لا يخالف شرع الله، بتبقى شيء جميل.
(منقول للإفادة)
ليست هناك تعليقات:
إرسال تعليق